Ерөнхий сайд Л.Оюун-Эрдэнэ уржигдар мэдээлэл хийхдээ “Төв банкны Ерөнхийлөгчийг улаан цээжээрээ хамгаалж байгаа нь үнэн. Ажлаа хийж байгаа хүмүүсийг хамгаалахаас ч өөр гарцгүй. Ганц, хоёрхон алдаан дээр бүдэрдэг Төв банкны Ерөнхийлөгчтэй байж болохгүй” гэх өөриймсөг өмөөрлийн хэдэн үгийг нүүрнийхээ өнгийг өөрчилж байгаад цухалзуулаад амжсан. Тэгвэл Ерөнхий сайдын улаан цээжээрээ хамгаалах хүний тоо нэг биш бололтой. Тэр эхлээд танхимынхаа сайд нарыг, дараа нь төв банкныхаа Ерөнхийлөгчийг хамгаалж, цухалдлаа. Маргааш аймгийн Засаг дарга нараа өмөөрч, уурсаж, байж ядахдаа бачуурлын хэдэн үгсийг биеэ барин байж хэлэх бололтой. Өмөөрөх нь, тогтвортой Засаг барих бодлого нь зөв. Гэхдээ муйхар аргааг бус, улаан цайм алдаатай нөхдийг улаан цээжээрээ хамгаалаад хол явахгүй гэдгийг сануулж хэлэх нь зүйтэй болов уу.

            Ерөнхий сайдын чихийг халууцуулж, “Тэр чинь болохгүй байна. Энэ сайд чинь ингээд байна” гэх хов сайдын суудлаас буугаад, аймгийн Засаг дарга нар руу шилжих нь ээ. “Даам” гарчихсан, том толгойтой, дураараа дургиж, дунд чөмгөөрөө наргиж байгаа нэгэн Засаг даргын тухай таагүй мэдээлэл хоймор нутгаар нэг “нисэж” байна. Бүр тодруулбал, Хөвсгөл аймгийн Засаг дарга Ш.Идэрбаясгалангийн зүй бус үйлдэл, хууль бус ажиллагааны талаар аймгийнх нь иргэд, түүний дор ажиллаж байгаа албатууд нь ам уралдан ярих болжээ. “Засаг дарга Ш.Идэрбаясгалан ажилтнууддаа ажлын байрны дарамт үзүүлж, хууль бусаар ажлаас нь чөлөөлж, дургүй хүмүүстээ удаа дараа сахилгын шийтгэл ногдуулж, ялгаварлан гадуурхахдаа гаарсан нэгэн” хэмээн эх сурвалж мэдээллээ.

             Ш.Идэрбаясгалан нь 1977 онд төрсөн, 45 настай, эрэгтэй. Тэрбээр 1989-1991 онд Мөрөн сумын нэгдүгээр 10 жилийн дунд сургуулийг дүүргэж, 1991-1994 онд Математик байгалийн ухааны дунд сургууль, 1994-1998 МУИС-ийн харьяа  Математик компьютерийн сургуулийг программ хангамжийн инженер мэргэжлээр бакалавр зэрэгтэй төгссөн байдаг.

         Мөн 2013-2016 онд Удирдлагын академийн харьяа Удирдахуйн ухааны сургуульд төрийн захиргааны менежментийн магистр зэрэг хамгаалж байжээ. Ш.Идэрбаясгалан нь 1998-2000 МУИС-ийн МКС-ийн программ хангамжийн тэнхимд багш, 1998-2000 онд "Хөвсгөл барнууд" ХХК-ийг үүсгэн байгуулж менежерээр ажиллаж байсан туршлагатай. Түүнчлэн 2004 онд УИХ-ын гишүүний бие төлөөлөгч, 2004-2007 онд Барилга хот байгуулалтын яамны төрийн захиргааны удирдлагын газарт мэдээлэл технологийн мэргэжилтнээр ажиллаж байсан нэгэн юм. Харин 2020 оны арванхоёрдугаар сараас өнөөдрийг хүртэл Хөвсгөл аймгийн Засаг даргаар томилогдон ажиллаж байна.

           Ш.Идэрбаясгалантай холбоотой хэд хэдэн ноцтой гомдол, мэдээлэл хууль хяналтын байгууллага болон Хүний эрхийн байгууллагад шалгагдаж байгаа юм байна. Түүнийг ажилтнуудаа удаа дараа сахилгын шийтгэл хууль бусаар ногдуулж, өнгө үзэмжээр харьцдаг гэх гомдол дийлэнхийг нь эзэлж байгаа гэнэ.

Энэ талаар эх сурвалж “Ш.Идэрбаясгалан дарга хурал хийх бүрдээ хүмүүсийн өмссөн, зүүснээр ялган харилцаж, “Энэ яадаг юм” гэсэн өнгө аясаар ажилтнуудтайгаа харилцдаг. Ажлын байрны дарамт байнга үзүүлж, тарах ёстой цагт нь тарааж, ажиллах ёстой цагт нь ажиллуулдаггүй. Чиг үүргийн бус баахан ажил ногдуулаад, хугацаа өгдөг. Хугацаанд нь багтахгүй болон цалингаас хасаж, амьдрах боломжоос минь хумсалдаг. Гэхдээ хүн бүрд их ажил ногдуулж, хавчин боогдуулахгүй. Өөрт нь таалагдахгүй байгаа нэгнийг хаширтал нь зовоож байгаа юм. Бид арга ядаад хандах ёстой байгууллагад нь түүний хууль бус үйлдлүүдийг баримтжуулж, илгээсэн” гэв.

Төрийн байгууллагад үр бүтээлтэй, санаачилга, идэвхтэй ажиллаж байгаа албан хаагчид улирал, хагас жил тутамд ур чадварын, үр дүнгийн урамшуулал гэж үндсэн цалингийнх нь 15-40 хүртэл хувьтай тэнцэх урамшуулал олгодог. Гэтэл Хөвсгөл аймгийн Засаг дарга Ш.Идэрбаясгалан бусдыг ялгаварлан гадуурхаж, өнгө үзэмжээр урамшуулал, цалинг нь олгодог баримтыг ажилтнууд нь мэдээлж байна.  

          Энэ талаар нэрээ нууцлахыг хүссэн нэгэн ажилтан “Хүний гадаад өнгө үзэмжид ихээхэн анхаардаг. Аймгийн ЗДТГ-ын ажилтнуудын олонх нь Засаг даргаасаа айж, “Хэзээ халчих бол, ямар үндэслэл бичээд явуулчих бол” гээд сандарч байна. Ковидын үед өөрийнхөө дургүй хүмүүсийг ялгаварлан гадуурхаж, их ажил даалгаж, өөрөө өргөдлөө өгөх хүртэл нь дарамталж байлаа. Түүнд хаягласан хууль, төрийн байгууллагын олон удаагийн шаардлага ирж байсан ч тэгсхийгээд өнгөрөөдөг. Ерөнхий сайдад нь хүртэл шаардах бичиг явуулахад хэл чимээгүй, хамгаалаад дуугүй байгаа. Үр дүнгийн урамшууллыг өөрийнхөө хүмүүст л удаа дараалан олгодог. Тэд нь ажлаа мэддэггүй, зарим нь ажилдаа байнга хоцорч, алдаа дутагдал гаргадаг” гэсэн юм.

Ш.Идэрбаясгалангийн жилийн орлого нь 1.4 тэрбум гэнэ. Тэрбээр аймгийн Засаг даргаар томилогдох үедээ хөрөнгө орлогын мэдүүлгээ дараах байдлаар мэдүүлжээ.

Нийт орлого: 1.387.251.000 төгрөг

Гэр бүлийн орлого: 109.600.000 төгрөг

Нийтийн орон сууц: Нэг

Үйлдвэрлэлийн зориулалттай оффис: Нэг

Орон сууц, барилга байгууламж нийт дүн: 244.108.000 төгрөг

Тээврийн хэрэгсэл: Суудлын жижиг машин,Toyota, Crown- нэг, жийп болон туулах чадвар өндөр,Toyota, Land Cruiser 80- нэг, жийп болон туулах чадвар өндөр, Toyota, Land Cruiser 200-нэг

Тээврийн хэрэгсэл нийт дүн: 225.000.000 төгрөг

Үнэт эдлэл, урлаг, түүхийн үнэт зүйл нийт дүн: 24.000.000 төгрөг

Дотоодын банк, санхүүгийн байгууллагад байрлах хадгаламж, данс, мөнгөн хөрөнгийн нийт дүн: 49.250.000 төгрөг

Авлага нийт дүн: 10.000.000 төгрөг

Хөрөнгө оруулалт: АЙ БИ ДИ ТИ ХХК ХХК, Галт шагай ХХК ХХК (0ш)

Хөрөнгө оруулалт нийт дүн: 2.000 төгрөг

https://ergelt.mn/news/1/single/19964