УИХ-ын эрхэм гишүүн, Засгийн газрын сайд гэх хэргэм зэргээс шууд л “шорон”-гийн ... тоот ялтан болно гэдэг бас л их “зориг”, том амлалт, эрсдэл. Тиймдээ Б.Батзориг гэх нөхрийн холбогдол бүхий шүүх хурлыг олон нийт анхааралтайгаар ажиглаж байгаа.

Б.Батзориг ХХААХҮ-ийн сайд байснаараа ЖДҮХС-гийн хөрөнгийг зүй бусаар ашигласан буюу бусдад албан тушаалтнуудад олгосон, олгуулсан гэх буруутан болж, ял үүрэх нь тодорхой болсон. Гэхдээ найман жилийн ял төлөвлөгдөж байсан ч эцэст нь ГАНЦ жил сууж байгаад гарч ирэхээр болж буй.

Хэрвээ Б.Батзориг тухайн үед найр тавьж ЖДҮХС-гаас зээл хүссэн УИХ-ын гишүүн болон албан тушаалтнуудад “УУЧЛААРАЙ” гэх ганц үгийг хэлсэн бол өнөөдөр тэр түүнээс ч дор байдалд хүрэх байсан биз. Өөрсдийнхөөр нь бол намынхнаа боддоггүй тэнэг нөхөр нэр дэвших эрх ч үгүй, лааз өшиглөх хэмжээнд хүрэх байсан биз. Тэгэхгүй тулд намынхан хийгээд хэзээ ч өөрт нь ашигтай байж мэдэх хүмүүст “ЗА” гэдэг үг хэлж, доод тушаалтнууддаа лүндэн буулгаснаар ЖДҮХС-гийн албан тушаалтнуудыг ч хоморгондоо чирсэн.

Б.Батзоригийг жинхэнэ ЖДҮ-чин биш гэдгийг Ерөнхий сайд, МАН-ын дарга У.Хүрэлсүх бататгаж өнөөдөр өөрөө албан тушаалын наймаа, арилжаагаар намын зарим гишүүнтэйгээ хариуцлага тооцож чадахгүй толгойг илсээр яваа. Арга ч үгүй биз. Өөрийнх нь төрсөн дүү У.Давхарбаяр хүртэл “Жаргалант мах импекс” компаниар дамжуулан зээл авсан байдаг.  

Гэтэл У.Хүрэлсүхийн өөрийн болоод намын гишүүдийнх нь ЖДҮ-гээс зээл авсан нь олон нийтийн дургүйцлийг хүргэж, энэ удаагийн сонгуулиар ялалт байгуулах хөгийг нь хөлд нь чирэхэд хүргэсэн. Тиймээс мань хүн хэд хэдэн удаа ЖДҮ-чдийг нэр дэвшүүлэхгүй гэж чанга дуугарсан ч, халаасандаа бол “салаавч” гаргаад зогсож байсан гэхэд мөрийцсөн ч алдахгүй л болов уу.